Alexa Giger vul intimar ils uffants da contemplar l’art, ils maletgs. Ins duess mirar exact, dretg, sanester, sisum, giudim e sa dumandar, tge ves jau. Per ex. cun sa fatschentar cun il maletg dals Trais Sontgs Retgs. Là pudessan scolaras e scolars descriver ed analisar las colurs, il musters ed ornaments ubain la vestgadira.
Il med d’instrucziun cuntegn 14 lecziuns cun trais parts: il commentari, ils fegls da lavur ed il material illustrativ. Per ils uffants haja quai bler material sco films u audiotecas, di Giger. Er ella ch'è oriunda da Surrein e lavura tar il Museum d’art dal Grischun a Cuira sco intermediatura d’art enconuscha il renumà pictur-artist Alois Carigiet gia dapi ch’ella era buoba.
Jau sun creschida si cun ils cudeschs da maletgs dad Alois Carigiet, e nus avevan grond tschaffen, cura che nus avevan els ch’eran signads originalmain.
Il med d’instrucziun Alois Carigiet è vegnì stampà en 200 exemplars tudestgs e 100 rumantschs. Las ovras che vegnan tractadas en quel derivan surtut dal legat Walter e Gertrud Gartmann-Köppel. Cumprar pon ins il med d’instrucziun tar il Museum Sursilvan Cuort Ligia Grischa a Trun.