Siglir tar il cuntegn

Museum Regiunal Surselva Dus dis suenter l’incendi restan be la ruina e pliras dumondas

A Glion è in deposit dal Museum Regiunal Surselva brischà. Sonda da las 23:00 èn ils pumpiers vegnids alarmads, sco la Polizia chantunala scriva. Els sajan stads en acziun cun 55 persunas. Er in'equipa d'ambulanza è stada al lieu, blessadas n'èn dentant naginas persunas vegnidas.

Il deposit è stà datiers da la plazza da gieu Paradiesgärtli ed il bogn avert. El ha cuntegnì objects dal Museum Regiunal Surselva, di la manadra e curatura Ursina Jecklin. Tranter auter è brischà en il fieu in vegl mulin da graun. Quel saja per adina pers.

En il deposit ha il museum deponì objects or da exposiziuns ch'ins ha puspè vulì duvrar, ed er objects or da l'istorgia da Glion. Suenter in'emprima egliada pudessi dentant esser che singuls objects èn restads intacts.

Jecklin ha ditg ch'i giaja uss per guardar, daco ch'il deposit ha cumenzà a brischar. Il museum haja ina assicuranza, ils objects hajan dentant ina valur immateriala, ins na possia betg remplazzar els.

Il bajetg brischà è oriundamain stà in deposit da graun da la Neumühle a Glion.

RTR novitads 16:00

Artitgels legids il pli savens