«Giuventetgna e musica populara» – uschia sa numna in project dals radios da la SSR SRG per 2015. Sut quai titel fan ils radios SRF - Musikwelle, RTS - La première, RSI - rete due e RTR - Radio Rumantsch communablamain tschintg emissiuns da chant e musica. Sonda ils 7 da november da las 17:00 enfin las 19:00 vegn registrà il concert en la regiun rumantscha, pli exact a Vella en la halla polivalenta.
Toc communabel
Duas furmaziuns che prendan part èn la fanfara Musica giuvenila Lumnezia e la chapella da musica populara Kapelle Oberalp. Ellas sa preschentan communablamain aposta per questa emissiun cun il toc Bürgenstock Polka. Il toc enconuschan gia omaduas furmaziuns. Perquai quinta la presidenta da la Musica giuvenila Lumnezia Marina Caduff era, che l'experiment gartegia. Simpel na saja i dentant betg, perquai che las duas musicas na vegnian probabel betg a savair far in exercizi communabel.