Siglir tar il cuntegn

Header

cuntegn

Surselva Musical «En 80 dis enturn il mund» tschertga anc acturas e acturs

Suenter l'emprim casting per il musical «80 dis enturn il mund» èsi cler, ch’i dovra anc ina segunda runda. Ma betg perquai che la qualitad da las acturas ed acturs na tanscha betg, mabain perquai che memia paucas persunas han interess da sa participar. Uss datti in segund casting l’entschatta 2019.

Ils organisaturs èn sa mussads da principi cuntents cun il casting da la dumengia a Vella. Il reschissur Roland Körner n’ha betg fatg in casting sco ins enconuscha da la televisiun. Las 13 giuvnas ed il sulet giuven n’han betg preparà in toc e preschentà quel, mabain il coach da chant Claudio Bezzola ha laschà improvisar ils giuvenils cun tocs pli u main enconuschents.

Alura han ils giuvenils era gì da mussar lur abilitads sco acturs. La finala era il president da l’uniun musical-surselva Daniel Blumenthal cuntent cun l’emprim casting, il sulet che fa in zic mal al venter ad el è la participaziun plitost magra.

audio
Mezdi: Musical Surselva – En 80 dis enturn il mund
ord Actualitad dals 30.10.2018.
laschar ir. Durada: 2 minutas 39 Secundas.

Dovra anc ina giada tants participants

La participaziun plitost magra al casting, uschia ch’ils organisaturs han la finala stuì stritgar in dals dus castings planisads, na po Daniel Blumenthal betg declerar.

Probabel hajan ins laschà memia pauc temp per s’annunziar e cun las vacanzas d’atun saja era pussaivel ch’il termin d’annunzia saja sco ì suten, di Blumenthal. Ord quest motiv vegnian ins uss era a far in segund casting probabel l’entschatta da l'onn 2019, han ditg Blumenthal e Körner. Il termin exact n’è anc betg fixà.

RR actualitad 12:00

Artitgels legids il pli savens