Siglir tar il cuntegn

Header

audio
Bunura: La Cadi ha surmuntà la crisa tar las musicas communalas
Or da Actualitad dals 23.01.2020.
laschar ir. Durada: 2 minutas 36 Secundas.
cuntegn

Musicas instrumentalas Cadi Las musicas survivan – ma quant ditg anc?

La crisa da las musicas en la Cadi era la fin dals onns 2000 evidenta. Las bleras musicas avevan ina structura da commembers che n’empermetteva betg grondas perspectivas. Ma la scena da musica en la Cadi ha pudì surmuntar quella crisa.

Las musicas han tuttas radund 30 commembers

Per las musicas èsi surtut impurtant da pudair far musica communablamain. Ma era d’avair la cumpagnia. Per il president da la musica da Trun, Gion Simeon, èsi impurtant da chattar l’equiliber tranter toleranza e squitsch. La persuna che stettia davanttiers, il dirigent, saja la persuna centrala, cun quella crodia u haja la musica savens success, u eba betg, di Simeon.

Collavuraziun impurtanta tranter las musicas

In dals recepts da success è la collavuraziun tranter las musicas. Uschia è la scena da musica en la Cadi, ma era en l’entira Surselva, colliada bain. Blers s’enconuschan da las musicas giuvenilas, dals champs da musica, u dad autras occurrenzas. E quai fetschia pli simpel da chattar gidanters per emplenir las retschas. Quai è tar tut las musicas da la Cadi necessari d’avair gidanters, conferman ils presidents unisono.

Ils giuvenils mancan

Ils giuvenils che fan musica èn vegnids pli paucs, conferman las presidentas ed ils presidents. La promoziun dals giuvenils saja cun la scola da musica buna, ma las annadas sajan pli pitschnas ed era las pussaivladads per ils uffants pli gronda, di per exempel Theres Burri Gadola la presidenta da la musica da Mustér.

Perquai saja impurtant dad integrar las scolaras ed ils scolars en las atgnas retschas ed adina puspè dar la pussaivladad da sunar era da concerts, quai motiveschia. Era visitas en las scolas fan las bleras musicas, uschia a Breil-Dardin, a Trun ed a Surrein-Rabius. Ma a lunga vista è la mancanza da giuvenils che fan musica in problem, conferman tut las presidentas ed ils presidents dumandads.

Musica giuvenila «Cool Band»

Il matg 2019 è sa furmada ina musica giuvenila en la part sut da la Cadi. Sco la presidenta Lara Vincenz ha ditg, eran els al cumenzament circa 10 musicantas e musicants. En il decurs dal onn hajan ins alura pudì sunar al concert da la musica da Surrein/Rabius sco era a la festa dal vitg da Rabius. Actual dumbra la furmaziun 17 musicantas e musicants tuts tranter 11 e 18 onns vegls che vegnan dals vitgs da Sumvitg, Surrein, Rabius, Trun e Tavanasa.

RTR actualitad 08:00

Artitgels legids il pli savens