En tut quinta la suprastanza da Mustér che la vischnanca ha d’investir aifer ils proxims 5 onns enturn 24 milliuns franc. Cun resguardar las entradas da contribuziuns e taxas restan la finala anc adina 17 milliuns francs per la vischnanca. Tenor il president communal Francestg Cajacob munta quai ch’ils daivets vegnan a crescher fin il 2021 sin var 20 milliuns.
Oravant tut sanaziuns
Cun prioritad stoppian ins ir vid la sanaziun da la scola nova. La sanaziun da la scola nova ch’è vegnida bajegiada 1980 è calculada cun 3,5 milliuns francs. Il cussegl decida 2016 davart il credit per la sanaziun, il pievel a l’urna il 2017. La sanaziun vul la vischnanca far en il decurs da 2017. Prioritad ha era la construcziun dal rempar per l’aual da la Val d’Acletta. Quest project ch’è calculà cun 2,5 milliuns ha survegnì prioritad pervia dal Ressort Catrina che vegn construì en la vischinanza. Tar bovas pudess il chanal da l’aual vegnir stuppà ed ir surora.
A favur da la scola vegn la sanaziun dal Center da sport e cultura spustada. Era il bajetg dal Center da sport e cultura ch’è var 40 onns vegls ha nair basegn d’ina sanaziun. Ils custs per far la sanaziun èn calculads cun 2 milliuns. Il cussegl ed il pievel decidan 2017 davart il credit. La sanaziun duai lura vegnir fatga il 2018.
Bancas dattan ils credits
Sin incumbensa dal cussegl da vischnanca ha la suprastanza era gì da sclerir, schebain la vischnanca survegn insumma ils credits necessaris dals instituts bancars. Sco quai ch’il president communal Francestg Cajacob ha ditg han las duas bancas ch’è represchentadas en il vitg garantì ch’ellas sajan prontas da dar aifer ils proxims tschintg onns credits en l’autezza da rodund 10 milliuns. Quai pervi dals projects turistics ch’èn sin via ils proxims onns e pervi da la funcziun da la vischnanca sco center regiunal. La suprastanza communala quinta d’avair fin il 2021 enturn 20 milliuns daivet.
Survista d'investiziuns grondas previsas ils proxims 5 onns sco quai che la suprastanza communala propona da realisar ellas sch’i va tut tenor plan
Project | Credit | Decisiun cussegl | Decisiun pievel | Execuziun |
Sanaziun chasa da scola nova | ca. 3.5 miu. francs | 2016 | 2017 | 2017 |
Sanaziun dal Center da sport e cultura | ca. 2 miu. francs | 2017 | 2017 | 2018 |
Remplazzament da l'illuminaziun publica | 495'000 francs | 2016 | referendum facultativ | 2016-2017 |
Sanaziun da differentas vias communalas | ca. 2 miu. francs | mintga project dapersai | mintga project dapersai | 2016-2021 |
Sanaziun da chanalisaziun e serenera incl. seraneras Cavardiras/Pardomat | ca. 3 miu. francs | mintga project dapersai | mintga project dapersai | 2016-2021 |
Rempar aual Val d'Acletta | ca. 2.5 miu francs | avust 2016 | settember 2016 | 2016-2017 |
Meglieraziun funsila | ca. 4.5 miu. francs cumpart vischnanca, total ca. 30 miu. francs | gia decidì | 24.4.2016 | 2017-2047 |
Vias forrestalas | ca 4 miu. francs cumpart vischnanca, total ca. 13 miu. francs | 2018 | 2018 | 2020-2030 |