Siglir tar il cuntegn

Surselva Mustér: 7 da 15 cussegliers da vischnanca sa retiran

La fin da zercladur è scadì il termin da desditga per ils posts communals da Mustér. Tranter auter dovri 7 novs cussegliers.

Chasa communala Mustér
Legenda: Per las elecziuns communalas a Mustér da l'atun èsi da tschertgar in triep candidats. RTR, G. Hosang

La fin da zercladur è scadì il termin da desditga per ils posts communals da Mustér. Prest la mesadad dal cussegl da vischnanca na sa lascha betg reeleger. Per Adrian Bigliel, Silvio Candinas, Jordana Lozza, Flavio Murer, Adrian Pally, Alfred Spescha e Rico Tuor èsi pia da chattar successurs.

Ina disditga hai era dà tar il cussegl da scola. Ulrike Lechmann na candidescha betg pli.. Per la cumissiun da gestiun n'èsi da tschertgar nagins candidats. Ils commembers actuals stattan a disposiziun per ina ulteriura perioda d’uffizi.

Suprastanza communala

Gia dapi l’avrigl è enconuschent che Mustér ha da tschertgar prest ina entira suprastanza nova. 4 dals tschintg suprastants sa retiran. Sulet Iso Mazetta ch’è dapi 2007 en suprastanza candidescha per ina ulteriura perioda d’uffizi.

Fin ils 26 d’avust pon vischinadis, partidas localas e gruppaziuns da votants da 15 persunas inoltrar a scrit lur propostas da candidats per ils posts communals. L’emprim scrutini è ils 25 da settember.