Suenter lunga discussiun davart la revisiun parziala da la lescha davart l’allontanament e la purificaziun da las auas ed il reglament correspundent ha il cussegl da vischnanca da Mustér approvà quel cun 12 gea e 3 na. Entras la revisiun s’augmentan las taxas per 50%. Quest augment dovri per evitar ch’il manaschi da la serenera ed il mantegniment na fetschia betg sco ils ultims 13 onns vinavant deficits. Cun l’augment pon ils custs da manaschi vegnir cuverts ed igl è pussaivel da far las investiziuns necessarias en l’infrastructura. L’augment vala gia per quest onn.
Grondas investiziuns
Tant la serenera a Raveras sco era la chanalisaziun ston vegnir sanadas. Vitiers vegn ch’igl è era da far ponderaziuns da construir sereneras per Cavardiras e Pardomat. En tut vegn calculà en ils proxims onns cun investiziuns da 3 milliuns. L’augment gida dentant mo a media vista. A lunga vista vegn ins probabel anc ina giada a stuair auzar las taxas uschia ha la suprastanza infurmà il cussegl.
Illuminaziun dal vitg
Perquai ch’il temp èra pulit avanzà è il credit per il remplazzament da l’illuminaziun dal vitg n’è betg vegnì tractà. Il credit da 480’000 francs per remplazzar l’illuminaziun ch’è en ils onns vegn tractandada en il proxim cussegl.