Las grondas midadas datti tar l’entrada. La cafetaria actuala vegn dischlocada en il sectur da l’entrada ed avant quella datti in plaz per seser e per s’entupar. Nov duai il Center da sport e cultura CSC survegnir in indriz da bowling ed ina halla da squash.
La halla da raiver vegn engrondida e las stanzas da fitness, spinning ed aerobic sco er la halla traidubla e la halla da tennis vegnan renovadas. In'opziun è da crear in plaz per beachvolley ed in indriz cun percurs da velos da muntogna.
Autas investiziuns
Sco il president da vischnanca da Mustér Robert Cajacob di, quintian ins cun autas investiziuns. Dentant na possia el betg anc prender posiziun, perquai ch’els stoppian contactar il chantun e guardar, co lez pudess sustegnair la vischnanca. Ed els stoppian era far in preventiv e guardar, tge ch’ins possia realisar la finala.
Pretensiun dals investiders
Ils investiders da l’hotel Acla da Fontauna pretendan era, ch’il CSC vegnia modernisà. Sche tut va tenor plan veglia la suprastanza preschentar il project ils 20 d’avrigl al cussegl da vischnanca, di Robert Cajacob. E forsa pudess la populaziun alura votar davart quel ils 10 da zercladur. Sch’i dat in «gea» pudess ins entschaiver a sanar ed engrondir il CSC la primavaira 2019.
RR actualitad 07:00