Siglir tar il cuntegn

Header

L'hotel Acla da Fontauna
Legenda: L'hotel Acla da Fontauna RTR, Hubert Giger
cuntegn

Mustér Critica envers ils investiders da l’Acla da Fontauna

Dacurt è cumparì in artitgel en la revista Beobachter che rapporta dal project Hotel Hilton a Spreitenbach (AG). En quest artitgel fa la redactura valair, ch’ils investiders, la Immo Invest Partner SA, n'hajan anc betg pajà ils quints dad intginas fatschentas. En tut sa tractia quai dad ina summa en l'autezza da 2,7 milliuns francs.

Glamurus èn mo ils nums

Il titel da l’artitgel è: «Glamurus èn mo ils nums». Cun quai manegia Andrea Haefliger il possessurs da l’hotel ed il cussegl d’administraziun da la Immo Invest Partner SA.

Gia cura ch’ella haja cumenzà cun las retschertgas haja l’advocat da la Immo Invest dentant empruvà da far squitsch. Ed el haja pretendì cun ina disposiziun superprovisorica da stritgar ils nums.

In bun sentiment

Era il president da vischnanca da Mustér Robert Cajacob enconuscha l’artitgel en il Beobachter. Ils investiders da l'hotel Hilton che vulan era bajegiar l’hotel Acla da Fontauna hajan gì detg avant onns, ch’els n'hajan betg anc pajà tut ils quints, perquai che las lavurs na sajan anc betg finidas, interruttas u betg exequidas sco quai ch'era vegnì fixà.

El haja però in bun sentiment, perquai ch’el enconuschia ils investiders. Quels sajan era stads a Mustér. Ed el saja da buna speranza che quai giaja enavant cun l’Acla da Fontauna.

Artitgels legids il pli savens

Ir a sanester Ir a dretg