L'Alp Run sur il vitg da Mustér è en possess da la societad simpla Alp Run e betg da la vischnanca. La societad ha uss dumandà per in sustegn finanzial da 119’000 francs per pudair far ulteriurs scleriments e cunzunt il rapport da la cumpatibilitad da l’ambient. Suenter ina lunga discussiun en il parlament, nua che surtut las garanzias per la vischnanca èn vegnidas tematisadas, ha il parlament decis da dar ils daners dentant sulet cun la resalva che la vischnanca survegniss era ina part, per exempel dal daner da solar planisà.
Svelt chattar ina via cun ils proprietaris
Perquai ha la vischnanca da Mustér uss da contractar da nov las premissas per ils daners cun la societad simpla Alp Run. La pretensiun dal cussegl communal è clera. Cura che la dumonda da construcziun vegn tractada sto la vischnanca avair in contract che reglescha ina participaziun communala. Bler temp na resta betg.
Premissas bunas ma blera intschertezza
Il territori da l’Alp Run è adattà per realisar ina gronda ovra solara alpina. Ils avantatgs èn ch'il territori n'ha quasi naginas pallids sut protecziun e probablamain era betg ina fauna e flora spezialmain sut protecziun. Quai vegnian dentant las examinaziuns ed il rapport ecologic en detagl a mussar, quel èn ils responsabels da l’IG Solalpine ussa vi dal cumpilar. Alura sa mussa sche las premissas èn propi idealas era areguard la dumonda da la rentabilitad. Differents puncts discurrian per il project sin l’Alp Run, auters era cunter, declera il responsabel per il project da l’interpresa Fanzun René Meier.
Planisada è ina lingia da radund trais kilometers
Per vegnir da realisar il project duvrass quai ina lingia per manar davent l’energia. Quella avess, tenor ils plans actuals, ina lunghezza da radund trais kilometers. L’avantatg è che la lingia è quasi be sin il territori da la vischnanca u da la societad simpla e perquai na dovria betg bleras contractivas cun possessurs da terren. Autras sfidas èn l’access al plazzal da lavur. Sco René Meier ha ditg a la sesida dal cussegl communal, èsi planisà da construir ina pendiculara da lavur per vegnir al lieu cun tut il material. Ils detagls n’èn dentant betg anc enconuschents.
Recurs retardassan tut
Per survegnir las subvenziuns da fin a 60% dals custs sto ina part da l’ovra esser en funcziun fin la fin dal 2025. Sche organisaziuns d’ambient fan recurs cunter in ni l’auter project alura s’entardass la procedura da lubientschas. I saja da quintar cun tals recurs. Els sajan dentant en contractivas e discurs cun las organisaziuns d’ambient per definir las premissas, di il president da l’IG Solalpine Ruedi Kriesi. Ins stoppia dentant restar realistic, cunter in ni l’autra ovra planisada vegnia a dar recurs. Quai muntia dentant betg che tals projects sajan alura dal tut giud maisa, sch’il pretsch per energia restia aut alura vegnian las ovras electricas era a realisar talas grondas ovras solaras.