Siglir tar il cuntegn

Header

cuntegn

Surselva Mustér dat glisch verda per tractativas da fusiun

Il cussegl da vischnanca ha decidì unanimamain d’approvar l’iniziativa per contractivas da fusiun per la Cadi. Mustér è uschia l’emprima vischnanca ch'ha decidì definitivamain.

I n’ha betg dà gronda discussiun. Las cusseglieras ed ils cussegliers da vischnanca èn stadas fitg bainvulentas a l’iniziativa. I saja da sustegnair l’idea da lantschar contractivas da fusiun hai gì num differentas giadas. Sch’ins guardia en autras regiuns, auters chantuns, lura saja quai pass pli che necessari, di il cusseglier Mario Flepp. I saja da far ils discurs ed elavurar pussaivladads co ch’ins possia collavurar. Tge ch’i dettia la finala ordlonder quai vesian ins lura, di la cussegliera Rita Huonder.

Center en la Cadi

audio
Bunura: Mustér dat glisch verda per tractativas da fusiun
ord Actualitad dals 18.02.2017.
laschar ir. Durada: 2 minutas 22 Secundas.

Ch’il cussegl è suandà a la proposta da la suprastanza fa plaschair al president communal Robert Cajacob. «I vegn adina puspè ditg che Mustér saja in centrum, perquai na vulain nus betg serrar las portas a las vischnancas vischinantas. Schain nus na, tagliain nus giu il fil a tuts. Nus vulain ch’era las autras vischnancas han la schanza da prender posiziun», declera Robert Cajacob.

Plaschair dal resultat ha era René Epp, in dals iniziants. La decisiun da Mustér saja fitg impurtanta, perquai ch’era René Epp vesa Mustér sco subcenter da Glion. Las vischnancas enturn profiteschian mo dad in ferm subcenter.

Spetgar sin las autras decisiuns

En las vischnancas da Tujetsch e Sumvitg han fin ussa ils gremis politics proponì da refusar l’iniziativa. Il pled final ha dentant il pievel. Tar las vischnancas da Trun e Medel na datti anc naginas decisiuns. La finamira da l’iniziativa è ch’i dettia fin 2019/2020 in project da fusiun per las tschintg vischnancas davart il qual il suveran po decider.

RR novitads 06:00

Artitgels legids il pli savens