Il restaurant, la recepziun ed il bogn sajan serrads dapi la stad. Quai ha il vicepresident da la Disentiserhof Betriebs SA Rolf Engler confermà ad RTR. Sia societad, la Mettlen Immo SA, aveva cumprà il hotel il december 2011.
Betg chattà ina schliaziun cun ils proprietaris d'abitaziuns
La finamira saja stada d'acquistar almain 50 enfin 60 abitaziuns da las total 157 abitaziuns. Quai na saja betg gartegià ed ils proprietaris d’abitaziuns n'hajan era betg vulì pajar per il bogn ubain discutar sur da la situaziun dal restaurant. Tenor Engler haja quel chaschunà deficits. En tut hajan els fatg cun il Disentiserhof in deficit da 750’000 francs. Els hajan investì plirs tschientmillis francs e cumprà abitaziuns per ca. 2 milliuns francs.
Nov hotel e center da terapia cun radon
Uss veglian els preparar in concept ed ina concurrenza d’architectura per il nov hotel. Quel duess cumpigliar 50-60 chombras dublas ed in center da terapia cun radon. Fin che quel è construì pudessan ils proprietaris d’abitaziuns dentant duvrar parts dal Disentiserhof sco il restaurant, il local da fitness ubain la sauna, di il vicepresident da la Disentiserhof Betriebs SA.
RR Actualitad mezdi 12:00