Mustér: Distec cun ina suletta emprendista

En Surselva datti mo ina firma d’industria: la Distec a Mustér. Ella scolescha mintg’onn quatter fin sis giuvenils. Ils 30.11.2016 ha ella organisà in di d’infurmaziun.

Alessandra Capaul e Marcus Jacomet Bild in Lightbox öffnen.

Legenda da maletgs: Alessandra Capaul e Marcus Jacomet. RTR, Hubert Giger

Actualmain lavuran 16 giuvens ed ina giuvna sco emprendists tar la Distec. La suletta polimecanista è Alessandra Capaul da Lumbrein. Ella frequenta il terz onn.

In motiv che mo paucas giuvnas sa decidan per questa professiun saja ch’ella haja il fauss num: «mecanist». Sch’ina giuvna audia quest num, alura dia ella: «Quai na fatsch jau segir betg», era sch’ella n'haja nagin'idea tge che quai saja. Alessandra di ch'ella saja sa decidida sco polimecanista, perquai ch’ella haja tschertgà ina lavur cun variaziun.

Betg simpel da chattar emprendists

Malgrà questa variaziun e las pussaivladads da sa scolar vinavant na saja quai betg simpel da chattar emprendists, di il responsabel per ils emprendists tar la Distec, Marcus Jacomet.

Per 2017 hajan els dentant gia trais annunzias, duas da quellas èn giuvens da Cuira e conturn. Questas annunzias dettian ina tscherta segirtad d'avair emprendists. Ma normalmain hajan els giuvenils da la Surselva che cumenzan l’emprendissadi. Els sentian dentant pli e pli che persunas da la Bassa s’annunzian per ina plazza.

In motiv ch’i n'è betg simpel da chattar giuvens – e surtut giuvnas – saja la digren da naschientschas, e forsa na saja la Distec betg anc enconuschenta avunda.

S'infurmar al lieu

Ils dis d’infurmaziun ch’èn mintg’onn porschan la chaschun d’emprender d’enconuscher la professiun da polimecanist e mecanist da producziun. Geniturs e lur uffants pon s’infurmar al lieu e vesair co i vegn lavurà.

Questa giada ha la Distec envidà duas persunas cumpetentas sco referents, il cussegliader da professiun per la regiun Surselva Vendelin Cabernard ed il responsabel per la furmaziun supplementara da Swissmechanik, Roland Stoll.

RR actualitad 11:00