Mustér e ses plazzal da construcziun gigantic

Las dimensiuns dal plazzal da construcziun dal resort Catrina èn nunusitadas per la vischnanca da Mustér. Perquai survegn el er stediamain visitas da vischinas e vischins.

Laschar ir video «Il plazzal gigantic dal Resort Catrina a Mustér»

Il plazzal gigantic dal Resort Catrina a Mustér

2:55 min, Telesguard dals 10.10.2017

Igl è in plazzal sco ins n'ha daditg betg pli vis a Mustér. Quai carmala era natiers las vischinas e vischins per guardar co las lavurs progredeschan.

Las cifras tar las dimensiuns impressiunantas

Per pudair cumenzar a construir la miraglia han 55'000 m3 material stuì vegnir stgavads ora e transportads davent. Var in quart è puspè vegnì enavos per la construcziun da betun. Per ils fundaments e las auzadas giudim dovri en tut 10'500 m3 betun – ubain var 2'000 camiuns. Latiers dovra quai anc 1'300 tonnas fier che vegn en il betun. Il fundament dal resort ha ina grondezza da 120 sin 90 meters.

Las lavurs progredeschan tenor plan

Tenor l'investider Marcus Weber va actualmain tut tenor plan. Il december 2018 duain las emprimas trais chasas, cun la part da wellness, las duas ustarias e la stizun da sport da las pendicularas gia vegnir avertas.

Perquai speran ins sin bun'aura per pudair terminar las lavurs da betun fin la fin november, uschia che la construcziun da lain po cumenzar primavaira.

Laschar ir video «Lavurs vid il resort Catrina en 8'500 purtrets»

Lavurs vid il resort Catrina en 8'500 purtrets

2:00 min, dals 6.10.2017

RTR Telesguard 17:40