Siglir tar il cuntegn

Header

video
Hotel Acla da Fontauna a Mustér
Or da Telesguard dals 22.04.2022.
laschar ir. Durada: 4 minutas 28 Secundas.
cuntegn

Mustér Hotel Acla da Fontauna vegn spazzà il 2023

audio
Hotel Acla da Fontauna – per la populaziun da Mustér hai dà infurmaziuns il venderdi saira
ord Actualitad dals 23.04.2022.
laschar ir. Durada: 3 minutas 6 Secundas.

Suenter 20 onns sco ruina para l'hotel Acla da Fontauna da vegnir stgarpà giu. Suenter numerus projects che n’èn betg vegnids realisads para quai d’avair ina fin. Sco il manader dal manegment da construcziun da l’Immo Invest ha confermà, veglian els cumenzar cun las lavurs il 2023. Emprim vegnia l'hotel stgarpà giu, era per pudair nizzegiar il material per far betun da recycling. Quai saja la raschun pertge ch’ins spetgia fin il 2023 da cumenzar cun las lavurs.

audio
Hotel Acla da Fontauna: nov cumplex il 2023
ord Actualitad dals 19.04.2022.
laschar ir. Durada: 2 minutas 57 Secundas.

Il hotel è en in nausch stan

Cura ch’ins entra en l'hotel sentan ins che quel stat gia blers onns vid. L’electricitad è tschentada giu e l’aua ha chattà la via en il bajetg. Ma per part èn anc ils letgs en las anteriuras chombras ed i para ch’ins pudess quasi cuntinuar cun il manaschi. Dentant, pli ensi ch’ins va en quest anteriur hotel e dapli donns d’aua ch’èn lura propi da vesair e da sentir. Uschia savuri da bulieu. Ma da l’autra vart è bler material ch’ins ha uss gia allontanà sortì fitg bain, en retscha, per lura pudair dismetter quai. Quai fetschia senn e saja prudent da far, uschia na possian ins betg simplamain vegnir cun il martè grond e dismetter tut senza misericordia, uschia Fredy Ganz.

audio
Impressiuns or da la «ruina»
ord Actualitad dals 19.04.2022.
laschar ir. Durada: 5 minutas 54 Secundas.

Tge vegn fatg?

Realisà duai vegnir in hotel cun 187 chombras e 10 suitas, sco era duas chasas cun abitaziuns da vacanzas. Uschia èn planisadas 30 abitaziuns per vender e 61 abitaziuns administradas. Il contract cun il gestiunari da l'hotel futur, la gruppa Accor, sajan gia suttascrits. Uschia vegnian ins lura era a realisar per exempel las chombras tenor il gust da Accor, che vegn a manar il hotel sut il num da Möwenpick. Investir ils proxims onns vul la Immo Invest circa 100 milliuns francs. Il temp da construcziun per tut duai durar circa trais onns.

Immo Invest tgi è quai?

Avrir la box Serrar la box

Els sajan ina interpresa plitost pitschna cun set collavuraturas e collavuraturs, uschia Fredy Ganz. A la testa èn ils dus frars schumelins Djordic. Els investeschian en projects mesauns e gronds, e quai sulet en agens projects. Pia era qua vegnan els a restar possessurs da l'hotel, era cura che quel saja finì. Il mument sajan els anc vid tschintg slteriurs projects, er en l'exteriur. En la fasa da realisaziun saja uss sulet il hotel Acla da Fontauna.

RTR actualitad 17:00

Artitgels legids il pli savens

Scrollar a sanestra Scrollar a dretga