Dapi la stad 2016 èn il restaurant, la recepziun ed il bogn dal Disentiserhof serrads. E quels na vegnian betg averts pli, ha il possessur ed advocat che stat en l’Appenzell Dadens Rolf Engler ditg ad RTR.
Ina clinica cun l'aua da radon sco terapia?
El n'haja nagins plans concrets per in nov hotel. L’emprim stuess el sclerir tschertas dumondas cun la regenza grischuna, sco per ex: Duessi dar in hotel cun stanzas da terapia, vul dir ina clinica, che vegniss alura sin la glista dals ospitals? E pudess ins duvrar l’aua da radon per ils pazients?
I saja grev da vegnir sin la glista dals ospitals, di Rudolf Leuthold da l’Uffizi da sanadad dal Grischun. Quai saja era ina dumonda dals custs e sche las cassas da malsauns surprendessan quels. Il pledader da medias Daniel Dauwalder da l’Uffizi federal da sanadad ha scrit ad RTR ch’i na saja betg cumprovà scientificamain che terapias da radon hajan in effect ed i na saja betg giustifitgà da duvrar radon per curas da wellness.
Legenda:
Il restaurant è e resta serrà.
RTR, Hubert Giger
Betg fitg motivà
Rolf Engler lascha sentir ch’el na saja betg fitg motivà il mument da cuntinuar cun in project sin l’areal dal Disentiserhof. Sia societad acziunara, la Mettlen Immo, aveva cumprà l’hotel il2011 da la Banca Raiffeisen. Ma bainbaud haja quai dà problems cun ils possessurs dals 157 appartaments. In exempel è che la Mettlen Immo vuleva ch’ils possessurs laschian a tschains lur appartaments a giasts da hotel. Ma quai n’è betg reussì.
Facts e figures da l’hotel Disentiserhof
Avrir la boxSerrar la box
1877 vegn l’hotel Disentiserhof avert sco albiert da noblezza cun bogns da cura da l’aua da radon da la Val Sogn Placi. Iniziant è stà il medi Augustin Condrau.
1908 cumpra la famiglia Tuor l’hotel. L’emprim maina Flurin Tuor quel, suenter ses frar Robert Tuor.
1979 è l’hotel vegnì spazzà e remplazzà dus onns pli tard cun il cumplex actual. L’avertura è stada 1982.
Da 1987 – 2005 vegn el manà cun success entras l’Utoring (Interhome, ina figlia da la Migros). In'attracziun speziala era la marca Globi cun il chastè per uffants (Villa Chischliun). Ils megliers onns ha l’hotel gì varga 60’000 pernottaziuns ad onn.
2005 vegn fundada la Nova Disentiserhof SA cun possessurs dals 157 appartaments sut la direcziun da Rainer Geissmann.
I va engiu cun l’hotel (il grond problem è che l’hotel n'ha nagins agens letgs) ed ils 26 d’avust 2011 vegn el ingiantà.
La Banca Raiffeisen daventa proprietaria e venda alura l’hotel Disentiserhof a la Mettlen Immo SA (cun l’intermediaziun da l’anteriur president communal da Mustér Dumeni Columberg).
Il grond problem da quest hotel è ch’el na dispona betg dad agens letgs e saja «dependents totalmain da la buna veglia dals proprietaris d’abitaziuns». L’obligaziun d’affittar pretendida a l’entschatta saja vegnida schliada 2005, uschia ch’ils proprietaris d’abitaziuns na sajan betg pli obligads da metter a disposiziun lur abitaziuns als giasts da vacanzas da l’hotel. In ulteriur factur negativ saja ch’i dovria il consentiment da tut ils proprietaris en condomini per far midadas sin l’areal da l’hotel ed ina part da quels na saja betg «fitg cooperativa».
(Funtauna: Messadi da la suprastanza communala al cussegl da vischnanca 33-2009/2012).
