Il curtin Hess saja in bischu amez il vitg. Era sche questa parcella saja en mauns privats veglian ins evitar insatge, che na faschess betg plaschair, di il president da la vischnanca da Mustér Robert Cajacob. Il mument sajan els vid reveder la planisaziun locala, ed alura saja era puspè stà la dumonda: tge faschain nus, nua vulain nus far insatge e nua è il center dal vitg.
En in lieu difficil
L’incumbensa dals students da la Scol’auta spezialisada saja stada d’animar la discussiun a Mustér, tge ch’ins veglia far cun questa parcella. - La discussiun, schebain la parcella duai restar libra u vegnir surbajegiada, declera il professur per architectura Christian Wagner.
Il resultat da las lavurs è stà: bajegiar in hotel. Mo perquai che la parcella cun il curtin Hess saja en in lieu difficil è il pensum stà grev per ils students. Ina dumonda centrala è: Tge rolla ha la staziun? Era Evelyn Bolliger che ha gudagnà l’emprim premi di, ch’i saja stà ina dira nusch, perquai che la parcella saja circumdada da plirs bajetgs.
RR actualitad 11:00