Dapi il 2018 producescha l’interpresa dad Anavon Skis a Mustér. L’interpresa è il mument anc vid crescher e dumbra actual tranter trais e tschintg collavuraturas e collavuraturs, tut tenor volumen da lavur, declera il mainafatschenta René Zähnler. Il mument vegnan producids radund 500 skis ad onn, ma la finamira è clera, l’interpresa vul crescher ils proxims onns. Sco René Zähnler di veglian els en 5 onns avair en tut 10 collavuraturas e collavuraturs e producir radund 2’000 skis ad onn. Quai saja quasi il maximum pussaivel a Mustér. La limita vegnia definida da la pressa da skis che pussibiliteschia da producir maximalmain tranter 2’000 e 2’500 skis ad onn, cura che quella limita saja cuntanschida, vegnian ins era a ponderar nua e co cuntinuar, ma il mument na saja quai propi anc nagin tema, accentuescha René Zähnler che maina dapi la stad 2020 l’interpresa da skis a Mustér.
Mastergnants èn stgars
Per pudair cuntanscher las finamiras, era cun il contract nov cun l’interpresa Bogner, saja necessari d’engaschar dapli collavuraturas e collavuraturs. La tschertga saja difficila, era els sentian la mancanza da mastergnants, ma els sajan fitg optimistics da chattar ulteriuras persunas cun flair manual e per skis, di René Zähnler. Segir saja gia, ch’els survegnian sustegn d’in emprendist a partir da la stad. Quai saja l’emprim emprendists en l’entir Grischun ch’emprendia la professiun da constructur da skis. Uschia veglian els segirar la producziun a Mustér.
Dasper la construcziun dals skis da Bogner vegn Anavon era ad organisar tut la vendita da products accessorics als skis, sco chapellinas, festa ed auter urden. Quels products na vegnian betg producids a Mustér, ma els administreschian l’entira cumpra e distribuziun, quai saja ina part dal contract cun l’interpresa da vestgadira da skis tudestga, l’autra saja la producziun dals skis, di René Zähnler.