La dretgira administrativa dal Grischun ha refusà il recurs da la fundaziun Helvetia Nostra. Quai resulta da la sentenzia dals 26 d’october 2021. Ils custs dal process da 9304 francs sto la fundaziun pajar ed er indemnisar la Immo Invest SA cun 6'000 francs.
Helvetia Nostra na fa betg recurs a la dretgira federala
Helvetia Nostra na veglia betg far recurs a la dretgira federala a Losanna. Quai ha la presidenta da la fundaziun, Vera Weber, confermà ad RTR. La raschun:
Nus stuain utilisar bain noss meds finanzials e persunals.
Helvetia Nostra aveva fatg recurs surtut encunter ils plans da bajegiar 30 abitaziuns secundaras. Plinavant ha ella fatg valair che quest project gigantic sfigureschia massivamain la cuntrada ed il maletg dal lieu, che la finanziaziun na saja betg garantida, ch’ins avessi stuì far ina concurrenza internaziunala d’architectura e che l’expertisa dal professer sur da quest project saja da metter en dumonda. Sco emprima instanza ha la vischnanca da Mustér refusà il recurs, e dacurt ha era la dretgira administrativa dal Grischun refusà quel.
Ils 28 da fevrer 2020 aveva la vischnanca da Mustér dà la lubientscha da bajegiar. Encunter quella aveva Helvetia Nostra fatg recurs ils 23 da mars. Il president da vischnanca René Epp beneventa la decisiun da la dretgira administrativa, ed el era leds che Helvetia Nostra accepta en quest senn la sentenzia.
Quai è naturalmain ina novitad fitg positiva per la vischnanca da Mustér e per l'entira regiun.
E quai veglia era dir che la vischnanca da Mustér haja fatg enorm buna lavur cun dar la lubientscha da bajegiar.
La Immo Invest Partner SA (cun sedia a Glattbrugg / Turitg) vul bajegiar in nov hotel sin l’areal da Acla da Fontauna che vegn manà da Möwenpick, 200 chombras, 61 abitaziuns administradas e 30 abitaziuns secundaras. Custs d’invesitiziun: ca. 100 milliuns francs. E sco il plidader da medias da la Immo Invest SA Fredy Ganz di veglian els realisar quest project.
Ord l'Archiv
Gia 2017 hai dà in project per l'hotel.
