Siglir tar il cuntegn

Header

video
Lavurs vi dal «Center Fontauna» han cumenzà
Or da RTR dals 03.05.2022.
laschar ir. Durada: 5 Secundas.
cuntegn

Mustér La sanaziun dal center da sport «Center Fontauna» ha cumenzà

A Mustér han cumenzà las lavurs per sanar il center da sport «Center Fontauna». Las lavurs vi dal bajetg che ha gia passa 40 onns, vegnan fatgas en etappas e cuzzan bun dus onns. Durant quest temp è previs che la gronda part da las purschidas restan mintgamai accessiblas. L'emprima etappa custa 10,6 milliuns francs. Da quels surpiglia la vischnanca stgars 8,7 milliuns. Per la segunda etappa èn previs custs da 3,5 milliuns, uschia communitgescha il center.

Spetgà ditg fin che lavurs han cumenzà

Passa in onn e mez suenter che las votantas ed ils votants da Mustér han approvà il credit per la valurisaziun dal Center Fontauna han las lavurs da construir cumenzà. Durant ils proxims dus onns è il center da sport in plazzal, ma tuttina restia la gronda part da las purschidas. Quai saja er la sfida gronda da mantegnair il manaschi e construir il medem mument, uschia il mainaproject Gioni Cavelti da l'interpresa «cavelti derungs sa» da Laax. Per els saja quai in di legraivel, finalmain possian las lavurs cumenzar ed ins possia guardar co tut va in sper l'auter ora, uschia Cavelti. Era ina sfida per il proxim temp vegn il material da construcziun ad esser, quel haja per part retard, ma cunquai ch'ins haja surdà uss gia lavurs per passa 5 milliuns francs, possian las interpresas planisar a temp ed uschia evitar retards, spera Cavelti.

Novas attracziuns e tuttina resta il vegl

Sper in nov local adattà per sport da sanadad e fitness vegnia era il spazi da raiver e bouldrar engrondì. Quai tant per ils turists sco era per ils indigens che fan diever da la purschida, uschia Gion Hosang, il manader dal Center Fontauna. Per els saja era impurtant che las lavurs vegnan bain vinavant, meglier che tut va e pli svelt ch'il manaschi po puspè vegnir manà sco usità. Surtut il manaschi cun champs da giuvenils saja ina entrada impurtanta per il center e perquai saja da gronda impurtanza che quel possia vegnir manà senza incaps, uschia Hosang. Ad onn generescha il «Center Fontauna» radund 15'000 pernottaziuns cun l'alloschi da gruppas d’uffants e giuvenils. Vinavant dettia era discurs cun l’armada d’activar l'alloschi per truppas en il temp tranter la stagiun, uschia ils responsabels.

RTR novitads 12:00

Artitgels legids il pli savens