L’idea è da far a Fontanivas var 2 km loipa per far passlung. Sco il president communal Francestg Cajacob di, fetschia la vischnanca quai perquai ch’i na saja betg da quintar cun naiv fin Nadal. Uschia dettia quai almain ina purschida da naiv en vischnanca. Damai che Fontanivas è l’enviern plitost sumbrivaun è il lieu adattà per ina loipa cun naiv artifiziala. Latiers vegnia quai ch’ins haja cun il stan da sajettar era ina tscherta infrastructura.
Pendicularas Mustér sa gidan
La vischnanca quinta cun custs da 25’000 francs. La gronda part da quests custs vegn duvrada per l’infrastructura da far naiv. La naiv produceschan las Pendicularas Mustér. Sco il directur Rudolf Büchi di, sa chapescha quai da sasez che las pendicularas sa gidian cun la vischnanca. Ils collavuraturs ed el surveglian il far naiv aifer il temp liber uschia che quai na custa nagut. Da questa purschida n’hajan las pendicularas directamain nagut.
Las pendicularas èn ina part dal sistem turistic e perquai avain nus grond interess ch’i dat ina purschida per ils giasts.
Nagina concurrenza cun Sedrun
I n’è betg la suletta loipa en la regiun. Era Sedrun ha ina loipa cun naiv artifiziala. La loipa a Mustér na saja betg ina concurrenza cun ella a Sedrun di Francestg Cajacob. «La loipa a Sedrun vegn ad esser surchargiada perquai ch’i vegn ad avair blera glieud là. Quai è simplamain ina cumplettaziun tar lezza purschida e nus n’avain qua betg il medem standard d’infrastructura sco quai che la loipa a Sedrun porscha» punctuescha Francestg Cajacob.
Ussa dovri be anc temperaturas fraidas e lura è la loipa aifer in’emna pronta per ils passlunghists.