Siglir tar il cuntegn

Header

cuntegn

Mustér Marcus Weber sustegna punt pendenta suenter Na dal suveran

L'investider Marcus Weber ha gia investì passa 130 milliuns francs a Mustér, tranter auter en las pendicularas. Uss sustegna el la construcziun da la punt pendenta cun la summa ch'il suveran n'ha betg vulì contribuir. Quai èn radund 390'000 francs, circa in quart dals custs totals dal project. Cun quai saja 90% da la finanziaziun segirada.

Hängebrücke bei Disentis
Legenda: Avant radund trais onns aveva l'uniun «la Pendenta» cummenzà a rimnar daners. Chantun Grischun

La punt pendenta vegn finanziada per gronda part or da meds privats. La vischnanca da Mustér ha gia sustegnì la planisaziun cun 90'000 francs ed il chantun Grischun ha mess en mira ina summa da 570'000 francs. Il parlament communal aveva approvà in'ulteriura contribuziun da 390'000 francs, suenter in referendum ha la populaziun decis da betg contribuir la summa giavischada.

Annunzià il sustegn han las pendicularas Mustér en ina communicaziun da pressa. Las pendicularas Mustér scrivan en lur communicaziun da la muntada da la punt per il turissem e ch'i saja «surprendent» che la vischnanca haja renvià quai sustegn tar las votaziuns communalas ils 18 da zercladur.

Cura e co la punt pendenta vegn realisada decidan las commembras ed ils commembers da l'uniun la proxima sonda ad ina radunanza extraordinaria.

audio
Per tadlar: curt e cumpact
ord RTR Audio dals 10.08.2023.
laschar ir. Durada: 1 minuta 5 Secundas.

RTR novitads 12:00

Artitgels legids il pli savens