Siglir tar il cuntegn

Surselva Mustér metta guntgida per l’avegnir

Il pievel da Mustér ha da decider davart la revisiun parziala da la planisaziun locala. Quella è da grond’impurtanza.

Legenda: Guardar il video «Mustér votescha davart la revisiun parziala da la planisaziun locala». Durada 2:32 minutas.
Or da Telesguard dals 26.11.2015.

La populaziun da Mustér decida davart la revisiun parziala da la planisaziun locala. Ina votaziun ch’è fitg impurtanta per la realisaziun da differents projects. Uschia è per exempel il ressort Catrina che las Pendicularas Mustér vulan bajegiar dependent che la revisiun vegn approvada. «Nus avain investiders concrets che vegnan ad investir sur tut ora tranter 80 e 100 milliuns francs. Quai ha Mustér anc mai gì ed jau fiss trist sche quai na vegniss betg realisà» ha ditg il president communal Francestg Cajacob. In problem fiss quai era per las pendicularas sezzas.

Jau fiss trist sche quai na vegniss betg realisà
Autur: Francestg Cajacobpresident communal da Mustér

Tenor il directur Rudolf Büchi dovrian els il ressort per pudair generar pernottaziuns ed uschia era giasts en il territori da skis. Senza quests giasts na vegnian ins betg da realisar ils gudogns necessaris per pudair far las investiziuns ch’i dovra en l’avegnir. «A lunga vista muntass quai ch’il territori da skis na pudess betg surviver en la furma actuala» di Rudolf Büchi.

In pachet

La revisiun da la planisaziun locala cumpiglia dentant era ina zona che stgaffescha la basa legala per pudair ennavar las pistas tranter S. Catrina e Lai Alv, la zona da mastergn a Pignola e Marias nua che pliras fatschentas han mussà interess da sa chasar ed ina zona speziala Disentiserhof nua ch'i duess vegnir construì in hotel da cura. Che tut questas midadas vegnan avant il pievel en il sulet pachet dat da discutar. Ord la populaziun audan ins ch'i fiss stà meglier da pudair votar da mintga singula zonas separà. Mo sco Francestg Cajacob di n’è quai legalmain betg pussaivel.

Persvader il giuvens

Tant la vischnanca sco era las pendicularas sezzas emprovan da persvader la populaziun dad approvar la revisiun. I saja cunzunt impurtant per la giuventetgna che haja uschia era in avegnir en la vischnanca, manegian tant Francestg Cajacob sco era Rudolf Büchi. Perquai ha la vischnanca era contactà las uniuns da giuventetgna per che questas fetschian attent sin l’impurtanza da la votaziun. Ultra da quai hajan ins era empruvà da cuntanscher la populaziun giuvna via las medias socialas, ha Francestg Cajacob ditg.