Siglir tar il cuntegn

Header

audio
Mustér: sbassar il pe da taglia da 120 sin 110%
Or da Actualitad dals 10.09.2021.
laschar ir. Durada: 03:22 minutas.
cuntegn

Mustér Pe da taglia 110 empè da 120%?

Ils 26 da settember 2021 decida la populaziun da Mustér, sch’il pe da taglia duai vegnir sbassà a partir da 2022 per 10 sin 110%. Ma la cumissiun preparatorica e la suprastanza communala han resalvas.

Motivs 

Il cussegl da vischnanca propona da sbassar il pe da taglia sin 110%. Intgins motivs:

  • Per esser ina vischnanca cumpetitiva dovri in pe da taglia attractiv.
  • Las investiziuns previdas duain vegnir realisadas tenor basegns sur in temp pli lung che 10 onns.
  • Suenter 13 onns cun in pe da taglia da 120% saja il temp madir da sbassar quel per 10%.

Ed impurtant da sbassar il pe da taglia èsi er per il cusseglier e president da l’uniun da commerzi e professiun, Edgar Durschei. Quai saja era in signal per las fatschentas.

I va la fin finala per plazs da lavur, per il commerzi ed il bainesser da nossa regiun.
Autur: Edgar Durschei cusseglier e president UCP

Resalvas da la cumissiun e da la suprastanza communala 

La cumissiun preparatorica e la suprastanza communala han dentant proponì da sbassar il pe da taglia en in emprim pass mo per 5 %. Sco il president da vischnanca da Mustér René Epp di, saja il pass da sbassar la taglia per 10% in grond pass.

Cun annual 350’000 francs en cassa è quai actualmain per la vischnanca in grond burdi finanzial.
Autur: René Epp president communal da Mustér

Cun pli pacs daners en cassa, sa sminuescha il cashflow. En vista a la populaziun stuess Mustér avair in cashflow pli aut che dus milliuns francs.  

Nus stuain sa sviluppar enavant ils proxims onns ed auzar quest cashflow almain sin 2,5 u 3 milliuns francs.
Autur: René Epp

Quai saja ina gronda sfida. Els vegnian da far quai mo cun augmentar l’attractivitad dal vitg e cun investir, di René Epp.

En cas che votantas e votants refuseschan la proposta dal cussegl da vischnanca, vul la suprastanza tractar puspè il pe da taglia gia en il proxim preventiv – quai cun analisar mintga dus onns in ulteriur sbassament, èsi scrit en il messadi per la votaziun.

 

RTR actualitad 12:00

Artitgels legids il pli savens

Scrollar a sanestra Scrollar a dretga