Siglir tar il cuntegn
cuntegn

Surselva Mustér: per il mument nagina basa da locomotivists

La Viafier retica na realisescha betg en il proxim temp ina basa da locomotivists a Mustér. Giud maisa n’è il tema betg.

Staziun da viafier a Mustér
Legenda: Tren è partì: per il mument na vegn ina basa da locomotivists betg realisada a Mustér. RTR, G. Hosang

La Viafier retica vess en sasez gugent realisà ina basa da locomotivists a Mustér. Quai betg sco davos per pudair reducir il dumber da pernottaziuns nunattractivas da locomotivists a Mustér. Mo era perquai che tant il cussegl grond sco era la vischnanca da Mustér han deponì il giavisch a la viafier da crear novas plazzas en la regiun.

Perquai ha la Viafier retica scrit ora la fin da l’onn 12 plazzas per locomotivists a Mustér. Sco Yvonne Dünser, la pledadra da medias da la Viafier retica ha ditg n’hajan ins dentant betg survegnì avunda annunzias qualifitgadas per pudair stgaffir ina basa da locomotivists. In'analisa interna haja dentant era mussà ch'ina nova basa a Mustér vess grondas consequenzas sin las basas gia existentas e ch'i na dess naginas pussaivladads da spargnar custs.

Eventualmain collavuraziun cun Viafier Matterhorn-Gottard

Ord tut quels motivs desistia la Viafier retica mumentan sin ina basa da locomotivists a Mustér. Tenor Yvonne Dünser na saja quai dentant betg exclus ina tala basa per il futur. Ils proxims mais dettia quai discurs cun la Viafier Matterhorn-Gottard davart ina basa communabla ed i vegnia periodicamain annalisà la pussaivladad da realisar ina basa da locomotivists a Mustér.

RR actualitad 12:00