La Immo Invest Partner SA n'haja betg midà il project sco els hajan pretendì. Quai di Vera Weber, la presidenta da Helvetia Nostra. Il project prevesia da construir 61 abitaziuns administradas turisticamain e 30 abitaziuns secundaras. Quellas cuntrafetschian a la lescha e perquai stoppian els far recurs a la Dretgira administrativa dal Grischun.
Fredy Ganz che maina il management da construcziun tar la Immo Invest Partner SA cuntradi dentant. Els hajan midà il project per ch'el correspundia a la lescha. Els sperian uss ch'els possian realisar il nov hotel Acla da Fontauna, perquai ch'els hajan gia pers bler temp ed impundì intgins daners.
Ils 28 da favrer ha la vischnanca da Mustér publitgà la lubientscha da bajegiar in nov hotel, 5 chasas d'abitar e 3 garaschas sutterranas. Sco il president da vischnanca da Mustér, Robert Cajacob, ha ditg a RTR, saja il project vegnì midà cun reducir per la mesadad il dumber d'abitaziuns secundaras, vul dir: la Immo Invest Partner SA possia realisar anc 30.
Il schaner 2018 aveva questa firma preschentà ses project. Previs era ch’i dettia in nov hotel da quatter stailas cun 208 chombras ed investiziuns da bun 100 milliuns francs.