Las lavurs sin las puntanadas en la baselgia han cumenzà l’entschatta da matg. Ellas duajan esser a fin lura sin l'entschatta avrigl 2019. Suenter las lavurs vi da la statica han ils restauraturs prendids enta maun las lavurs vi dals maletgs e vi da l’altar grond. L’emprim vegn lavurà vi dal chor da la baselgia per che quellas puntanadas possian vegnir demontadas gia il november da quest onn.
Restauraziun dals maletgs ha cumenzà mez avust
Cun la restauraziun dals maletgs en il chor da la baselgia han ins cumenzà mez d’avust. La finamira è da pudair terminar las lavurs en il chor la fin d'october. Quels maletgs èn da l'artist Fritz Kunz e da l'onn 1913.
Ils maletgs en la nav da la baselgia èn era da Kunz, quels èn però vegnids fatgs pir l’onn 1925 e cun in zic in’autra tecnica, di la manadra da la restauraziun Sylvia Fontana. Ils maletgs sajan il mument fitg tschufragnads, hajan bler stgarps e sajan surtut contaminads tras micro-organissems, tras bulieus.
Bulieus sin ils maletgs
Per ch’il bulieu possia sa multiplitgar, dovria quai trais facturs. Ina giada umiditad, lura nutriment sco per exempel contaminaziuns e lura ils organissems. Quels organissems sajan dentant dapertut en l’aria e suenter ch’ils maletgs da la baselgia n’hajan 100 onns betg pudì vegnir schubregiads, saja era il nutriment avant maun.
Cun sanar ils mirs en il nord da la baselgia saja vegni empruvà d’evitar ch’i dettia dapli umiditad. Cun ina isolaziun speziala vegnia surtut evità che las paraids suan la stad e furman uschia aua, han explitgà il manader dal project Andreas Isler e l'architect Matthias Schmid.
Il november pon ils custs vegnir stimads
Sco Isler ha ditg sajan las lavurs il mument sin buna via. Il mument dovria quai anc soluziuns en detagl per il palantschieu, uschia ch’ins possia lura dir il november sch’i dettia anc ulteriurs custs.
Era vegnan uss fatgas las lavurs da renovaziun vi dals altars. Qua fa surtut il bau da laina problems – quai ch'era gia enconuschent. Il bau vegn cumbattì cun insecticid. Ma era l’altar è per part contaminà cun bulieus – quai n’avevan ins betg constatà il 2006.
RR actualitad 17:00
