Dapi il schaner 2017 ha Robert Cajacob presidià la vischnanca da Mustér. IL venderdi saira ha el communitgà sia demissiun al cussegl da vischnanca. Perquai ch'i saja stà avant quatter onns grev da chattar candidats per la suprastanza haja el gia uss communitgà ch'el na candideschia betg pli.
Communitgà gia avant in lung temp
Perquai haja el gia infurmà avant in lung temp ses collegas, ch’el fetschia sias ponderaziuns e ch’el vegnia a communitgar sia decisiun uschè spert sco pussaivel.
Il temp da demissiunar è ils 26 da zercladur, l’elecziun per ina nova suprastanza ed in nov cussegl da vischnanca da Mustér ils 27 da settember.
Plirs projects anc sin maisa
Robert Cajacob resta anc president fin ils 31 da december 2020. Fin lura veglia el lavurar vid projects sco il nov hotel Acla da Fontauna, il nov center da sport e la via da guaud da la Val da Segnas fin a la Val Sogn Placi.
Suenter vul Robert Cajacob – che cumplenescha il 1. da settember 67 onns - giudair il temp cun sia dunna e sia famiglia ed emprender d’enconuscher anc meglier la Svizra.
RTR novitads 06:00