Siglir tar il cuntegn

Header

Navigaziun

Legenda: Tadlar il audio Mezdi: Directur e president pencidularas Mustér para betg problem. Durada 02:21 minutas.
02:21 min, Actualitad dals 20.02.2019.
cuntegn

Surselva Mustér: Rolla dubla da Marcus Weber n'è para nagin problem

Suenter che Rudolf Büchi è sa retratg sco directur da las pendicularas da Mustér surprenda Marcus Weber sia lavur, sco RTR ha rapportà. Quai na saja dentant betg ina schliaziun per adina, di el che è era president dal cussegl d’administraziun da las pendicularas da Mustér.

Fin ch’in nov directur saja elegì lavurian els en in gremi da 3 persunas:

  • Nando Antonio Calore maina la hotellaria e la gastronomia,
  • Stefan Arnold la tecnica
  • e Marcus Weber l’administraziun.

Els sajan sa decidids da na siglir en l’aua fraida e da prender gist insatgi che maina las pendicularas. L’emprim veglian els guardar cun las persunas ch’els hajan, e tge fermezzas che quellas avessian sco successur da Rudolf Büchi. Mo co è quai, sch’ina persuna è il medem mument president dal cussegl d’administraziun e directur da las pendicularas da Mustér?

Pendicularas en fasa decisiva

Quai na saja nagin problem – ni de iure ni de facto, di Andreas Deuber. Ins possia cumular questas duas funcziuns. Mo i saja uschia ch’il cussegl d’administraziun saja in organ da strategia e controlla. El controlleschia era il schef da l’interpresa. E sche la medema persuna ha quests dus uffizis, na possia quai forsa betg funcziunar en la medema qualitad.

Cumulaziun dals uffizis per dapli efficienza

Las pendicularas da Mustér sajan dentant en ina fasa decisiva da sa midar dad ina interpresa tradiziunala en in concern da turissem, nua che era la hotellaria gioga ina rolla impurtanta. En questa fasa veglia el manar directamain e spert sia interpresa. Sch’ils dus uffizis sajan ensemen giaja quai propi effizientamain.

Marcus Weber ha surprendì 2014 la maioritad da la aczias da las pendicularas da Mustér. El investescha da quai da 90 milliuns francs en il resort Catrina cun 6 chasas, en la pendiculara Sedrun/Salins – Cuolm da Vi ed en ils indrizs da far naiv.

RR actualitad 11:00