Mustér sa prepara per l’elita da parasguladers

In’emna èsi da vesair a Mustér e conturn blers tachels da tuttas colurs vid il tschiel. L’elita mundiala da parasguladers sa mesira durant in’emna en differentas cursas.

Marc Demont Bild in Lightbox öffnen.

Legenda da maletgs: Marc Demont dal comité d'organisaziun, procura che tut è pront. RTR, G. Hosang

L’Uniun Disentis Open vegn tranter auter sustegnida dals Surselva Flaigers, l’uniun da parasguladers indigena. Els sa gidan cun metter a disposiziun l’infrastructura ch’i basegna. Sco quai che Marc Demont, il president dals Surselva Flaigers e commember dal comité d’organisaziun di, tanscha quai davent dal drizzar en il biro da cursa, sur ils plazs d’atterrar e da partenza fin tar far transports cun ils pilots. En tut vegnan var 40 persunas a sa gidar durant las cursas da la cuppa mundiala da parasguladers.

Var 120 dals megliers parasguladers dal mund vegnan a sa participar a las differentas cursas. Igl è l’emprima giada ch’ins po manar atras a Mustér cursas da la cuppa mundiala. Tenor Martin Scheel, l’iniziant ed organisatur, tutga Mustér tar las meglras regiuns da sgular da l’entir mund.