Pascal Stoll, Vus daventais il matg nov mainafatschenta da Sedrun Mustér Turissem. Uss essas Vus pilot. Co sa collian questas professiuns?
I dat atgnamain bleras parallelas tranter l'aviatica ed il turissem. Perquai ch'igl è era ina collaboraziun tranter blers acturs, nua ch'ins creescha in product che vegn preschentà e vendì. Sco pilot ston ins coordinar tranter tut ils acturs. E sch'i dat ina giada problems, ston ins surpigliar responsabladad e communitgar bain. Tar il turissem èsi il medem. Ins ha blers acturs: hotellaria, pendicularas, vischnancas, segundas abitaziuns, ins sto prender si ils giavischs e chattar soluziuns.
Tge colliaziun persunala avais vus cun Sedrun/Mustér?
Jau hai abità enfin 5 onns ad Acletta cun mia mamma e mia tatta. Mia mamma ha lura anc maridà ina giada, e lura essan nus ids a Val S.Pieder. Jau sun lura era anc ina giada stà 4 onns en il gimnasi da Mustér ed hai emprendì in zic rumantsch. Jau chapesch in zic, stoi dentant anc exercitar per pudair discurrer. Latiers essan nus stads bunamain mintga stad a Mustér. Dapi il matg vivel jau ussa puspè cun mia famiglia a Mustér.
Daco gest turissem?
Turissem ha adina fascinà mai. Sch'i na fiss betg gartegià cun daventar pilot, lura avess jau cumenzà la scola da hotellaria.
En il post sco mainafatschenta hai dà bleras midadas ils davos onns. Fa quai starment?
Na, mia finamira è ussa propi da m'etablir qua ed era restar ils proxims onns . Jau sper che la glieud è cuntenta cun mia prestaziun. Ed jau vesel era quai sco bella sfida.
Nua savais Vus gia che Vus vulais tschappar en?
Jau pens ch'ins pudess anc far dapli per la stagiun bassa. In focus è segir era da metter anc pli fitg sin famiglias e porscher a lezzas aventuras che restan en memoria. Uschia che era ils uffants vegnan in di en la regiun cun lur famiglias a far vacanzas.