Gist il hostel haja purtà la pli gronda surpraisa: Quellas chombras sajan stadas occupadas fitg bain era da famiglias, di il possessur ed acziunari principal Marcus Weber. Las abitaziuns dal ressort na sajan dentant betg stadas occupadas uschè bain.
Ils osps reservan gia baud
In dals motivs pertge che las abitaziuns da vacanzas dal ressort na sajan betg stadas occupadas uschè bain, saja d'attribuir al mument da reservaziun, declera Marcus Weber: Las vacanzas vegnian savens reservadas gia la fin da la stad e sin il pli tard l’atun e lura n'era la purschida nova anc betg enconuschenta.
En pli saja pussaivel che plirs giasts na vulevan betg star sin in plazzal da construcziun.
Fin l'october duai tut esser finì
Durant la stad vegnan uss terminadas las lavurs vi da las ultimas quatter chasas. Quai saja impurtant per che tut saja pront sin la stagiun d’enviern.
Er planisà è d’augmentar las purschidas per mountainbikes: Perquai vegnia construì er in parc da pumptrack dasper il ressort.
