Bun 400 persunas èn stadas a l’infurmaziun da las vischnancas da Tujetsch e Mustér davart projects turistics en la regiun. Cunzunt perquai che Mustér ha da decider en curt a l’urna plirs credits saja quai tenor Francestg Cajacob, president communal da Mustér, impurtant da pudair dar ina buna infurmaziun. Uschia èn era plirs referents stads da la partida che han declerà ord lur vista pertge ch’ils projects èn impurtants per els.
Previs èsi che la vischnanca da Mustér sa participescha cun 2 milliuns vid ils indrizs da far naiv da las Pendicularas Mustér. Quels custan totalmain 9 milliuns. Ultra da quai duai la vischnanca era sustegnair il project da la pendiculara da colliaziun dal territori da skis da Mustér a Sedrun. Quest project custa 15 milliuns. La vischnanca duai dar per quest project 2,5 milliuns sco emprest che vegn tschainsì e pajà enavos aifer 20 onns. Il medem vala era per la vischnanca da Tujetsch. Latiers vegnan anc 2,5 milliuns sco garanzia da deficit per l’emprest da la confederaziun.
Chantun e confederaziun sa participeschan
Vid ils dus projects che custan total 24 milliuns sa participeschan la confederaziun ed ils chantuns Grischun ed Uri cun var 8 milliuns. Persuenter vegni pretendì da las pendicularas Andermatt-Sedrun e Mustér da lavurar ensemen. Il chantun pretenda era ch’il project d’ennavar e la colliaziun tranter Mustér e Sedrun vegnia decidida en il medem pachet. Tenor cusseglier guvernativ Jon Domenic Parolini na saja quai betg fatg squitsch, tschertas pretensiuns fetschia il chantun dentant sch’el dettia daners. Cun il Progetto San Gottardo possian ins dar in sustegn pli grond che quai che autras regiuns hajan la pussaivladad da survegnir, ha el ditg vinavant ad RTR.
Sistir ils projects
Sche Mustér na vul betg sustegnair las pendicularas, lura vegnissan ils projects sistids, uschia Marcus Weber, l’acziunari principal da las Pendicularas Mustér. Quai deplorassi el. Pertge i saja pli simpel da far reclama sin la fiera internaziunala cun in grond territori da skis, vul dir Andermatt-Sedrun e Mustér che mo cun in pitschen. Sco Marcus Weber di vinavant, è la nova pendiculara dentant era impurtanta per la stad. Il Resort Catrina ch’è en planisaziun stoppia era esser occupà durant la stad per render.
Il cussegl da vischnanca decida ils 25 d’october davart ils credits. Las votantas ed ils votants ils 27 da november a l’urna.
Rempar Acletta
La medema fin d’emna ha il suveran da Mustér era da decider davart in credit da 2,3 milliuns per il rempar en la val d’Acletta. Il rempar avess stuì vegnir realisà uschia ni uschia ils proxims onns. Pervia dal Resort Catrina è quel dentant vegnì tratg enavant.