Il cussegl da vischnanca è vegnì infurmà davart ils resultats dal terz concept a chaschun da sia ultima sesida. Tenor il suprastant communal Roger Tuor saja era il cussegl stà quel che haja giavischa avant dus onns tals concepts.
L’idea è stada d’avair ina survista detagliada davart il futur da l’entir Center da sport e cultura avant che far investiziuns en la sanaziun. Il concept cuntegn bleras visiuns ed ideas.
In plaz da tennis en la halla svaniss
Uschia per exempel duai quai dar ina halla da giugar e la cafetaria duai vegnir en il sid dal bajetg. Persuenter svaniss in plaz da tennis en la halla da tennis. Era l’entrada stuess tenor il concept vegnir concepida da nov. Sco Roger Tuor di, saja quella vegnida tralaschada in pau ils ultims onns. Cun ina nova entrada vegnissan ils giasts era manai meglier ed avessan la survista da las purschidas.
Betg per il truclet
Cun augmentar la purschida pudessan era duas fin trais plazzas da lavur vegnir creadas. Quellas pudessan tenor Roger Tuor tut tenor vegnir finanziadas ord l'augment da purschidas dal Center da sport e cultura. Tenor el èsi era fitg necessari per il prosperar da la regiun che uschè bler sco pussaivel dal concept vegnia era realisà e na svaneschia betg en truclet. Quai purtassi en mintga cas dapli frequenzas ed era dapli giasts per la destinaziun da Sedrun Mustér.
Concurrenza d’architectura
La vischnanca da Mustér sto quintar d'investir var dus milliuns en il center sulet per la sanaziun. Ulteriurs milliuns dovri per realisar intginas da las novas purschidas e far intginas da las midadas tenor ils concepts, di Roger Tuor. Ils trais concepts ch'èn ussa avant maun èn la basa per ina concurrenza d'architectura. Envidads vegnan en il decurs da l’atun u l'entschatta da l'auter onn architects indigens.
RR actualitad 07:00