Surselva - Mustér vul er colliar ils ultims aclauns vid la serenera
A Mustér duai l'aclaun Cavardiras vegnir collià cun ina chanalisaziun cun la serenera a Disla. Ensemen cun ils aclauns da Pardomat e Madernal è Cavardiras il sulet che n’è anc betg collià cun in sistem da nettegiar las auas tschuffas confurm a la lescha.
Cun 6 encunter 5 vuschs ed in’abstenziun ha il cussegl da vischnanca approvrà in credit da 629’000 francs per colliar Cavardiras cun la serenera a Disla e per construir in fussal d’aua da plievgia. L’ultim pled en chaussa ha la finala il suveran da Mustér.
