Siglir tar il cuntegn

Header

La vischnanca da Mustér.
Legenda: La vischnanca da Mustér investescha proxim onn bunamain 10 milliuns francs. ANR, Hans Huonder
cuntegn

Surselva Mustér vul investir proxim onn 9,3 miu. francs

Il cussegl communal da Mustér ha approvà il preventiv per il 2017. La vischnanca planisescha d’investir totalmain 9,31 milliuns francs. In quart dals daners vegnan impundids per sanar il rempar Val Acletta e per curreger la Via Acletta.

Tar expensas ed entradas da radund 14 milliuns francs resulta in surpli d'entradas da prest 665’000 francs.

In onn plain investiziuns

Il 2017 vegn in onn cun bleras investiziuns per la vischnanca da Mustér. 9,31 milliuns francs èn budgetads, e dapi la gievgia saira er approvads dal cussegl communal. Las investiziun nettas muntan a 6,63 milliuns francs.

Sco la vischnanca communitgescha, sa repartan las pli grondas investiziuns suandantamain:

  • sanaziun da la chasa da scola
  • sanaziun dal center da sport e cultura
  • chanalisaziun e serenera
  • sanaziun dal rempar Val Acletta
  • correctura Via Acletta
  • divers projects turistics

2,3 milliuns francs per projects Via e Val Acletta

Gia la fin d’october era la summa per la sanaziun dal rempar Val Acletta e per la correctura da la Via Acletta vegnida enconuschenta: Per segirar las pendicularas ed il planisà «Resort Catrina» impunda la vischnanca 5,6 milliuns francs. Quai correspunda a la summa totala da bajegiar.

Da questa summa vegnan tratgas giu las contribuziuns dal chantun, da las pendicularas e da l'investider dal resort. Uschia resta per la vischnanca anc da surpigliar ina summa da 2,3 milliuns francs.

Il cussegl communal ha plinavant decis da laschar il pe da taglia sin 120%. Ultra da quai ha el approvà la lescha da santeri.

RR novitads 14:00