Siglir tar il cuntegn
cuntegn

Surselva Nadia Deplazes è guid da viandar

Dapi intgins onns porscha l’uniun da Sendas Grischunas la pussaivladad da sa scolar sco guid da viandar. Nadia Deplazes ha nizzegià questa chaschun ed ha fatg in diplom federal.

Radunanza da l'uniun Sendas Grischunas a Trun en la chasa da scola veglia.
Legenda: Radunanza da l'uniun Sendas Grischunas a Trun en la chasa da scola veglia. RTR, H. Giger

Gia avant 15 onns manava ella turas cun lamas, e lura èsi stà la dumonda, sche quai saja lubì da manar turas senza avair in diplom per far quai. Sco guid da viandar vegni pretendì bler : ins sto savair manar ina gruppa e dar infurmaziuns sur da cultura, fauna, flora e geologia. Impurtant è era la segirtad. Nadia Deplazes è engaschada surtut en la Cadi, mo mintgatant maina ella turas era en auters chantuns.

Funcziun impurtanta en il turissem

Scolaziun da guids da viandar è era stà in tema sonda suentermezdi a la radunanza da commembras e commembras da Sendas Grischunas. Era il president Walter Grass ha ditg ch’ils guids da viandar adempleschian ina funcziun impurtanta en il turissem.

Ultra da quai ha el infurmà dal project graubündenHIKE. I sa tracta surtut d’in project per intercurir e meglierar las sendas en il Grischun. El è dotà cun 3,2 milliuns francs.