Il november passà è la filiala da la Banca Chantunala Grischuna a Sedrun vegnida averta. Cun l’avertura da la filiala èn era las abitaziuns stadas a disposiziun per cumprar u prender a tschains. Fin ussa èn las abitaziuns dentant restadas vidas.
Sco quai che Eduard Gasser, commember da la direcziun da al Banca Chantunala Grischuna ha ditg a Radiotelevisiun Svizra Rumantscha èn ils tschains per l’affittaziun vegnids reducids levet. Tenor el ha quai gia gì effect. Ina abitaziun possia ussa vegnir occupada.
Nagin squitsch
Eduard Gasser di era ch’ils tschains correspundian al martgà local d’abitaziuns cun questa grondezza e qualitad. I sa tracta d’abitaziuns cun il standard da minergia P. Quai haja per consequenza ch’ils tschains èn pli auts, persuenter èn ils custs accessorics pli bass declera Eduard Gasser. Squitsch da vender u laschar a tschains las abitaziuns n’haja la banca betg. Ins haja uschia ni uschia quintà ch’i giaja almain dus onns fin che las abitaziuns sajan vendidas u laschadas a tschains, ha ditg Eduard Gasser.