Quest tschancun tranter Madernal e Mustér è registrà en l'inventari federal da las vias da communicaziun istoricas da la Svizra.
Stà perplex, co questa via istorica è sa midada
Durant ina tura da velo è Leo Tuor stà perplex, co il caracter da la cuntrada è sa midà. En in scriver a la vischnanca da Mustér supplitgescha el da franar las lavurs da destrucziun e da salvar quest tschancun istoric.
La cumissiun da meglieraziun conferma a Tuor e pli tard er a RTR che tut las lubientschas sajan avant maun. Che tut giaja tiers endretg.
Tschancun delicat
Encunter il project da meglieraziun tranter Madernal e Mustér avevan la Pro Natura, il WWF e la fundaziun svizra per la protecziun da la cuntrada inoltrà ina protesta communabla. Il 2015 èn las autoritads dal chantun, la cumissiun da la meglieraziun e las uniuns per l'ambient perquai s'inscuntradas al lieu. Era da la partida è stà il manader da l'inventari federal da las vias da communicaziun istoricas da la Svizra, l'IVS
Decisiv ch'i dettia insumma ina lubientscha da bajegiar ora quest tschancun istoric è la finala la posiziun da l'IVS stada. Suenter che lez ha dà glisch verda sut la cundiziun che pretensiuns rigurusas vegnian resguardadas, han las uniuns per l'ambient retratg lur protesta.
Uniuns per l'ambient èn indignadas
Il scriver ed ils maletgs da Tuor èn era idas a la regenza ed a las differentas uniuns d'ambient. Las uniuns partan l'avis da Tuor. Ludmilla Seifert, manadra da la protecziun da la patria:
Quai è ina situaziun nunpussaivla. In exempel co destrucziun vegn subvenziunada.
Franziska Grossenbacher vicemanadra da la fundaziun Svizra per la protecziun da la cuntrada:
Nus avain retratg nossa protesta en confidenza che las pretensiuns rigurusas vegnian resguardadas. Quai è in ferm abus da confidenza.
Schoccà è er il manader da l'IVS.
Nossas pretensiuns n'èn insumma betg vegnidas resguardadas. Ellas èn vegnidas interpretadas fauss.
Nagin stop da bajegiar
La reclamaziun da l'IVS è uss tar l'Uffizi d'agricultura e da geoinfurmaziun dal Grischun. Sin dumonda da RTR di l'uffizi, ch'i na dettia betg in motiv d'interrumper las lavurs. Las pretensiuns fatgas da l'IVS vegnian tenor els resguardadas.
Nus na destruin betg ina via istorica
Walter Deplazes, il president da la cumissiun da la meglieraziun da Mustér, refusescha las renfatschas. Els na destrueschian betg ina via istorica:
Nus faschain quella pli lada e mettain ella puspè en il stan, sco quai ch'ella è uss, jeu less dir schizunt meglier cun ils mirs sitgs da mintga vart.
La cumissiun haja resguardà las pretensiuns ch'ils uffizis chantunals e federals hajan fatg, cura ch'il project da meglieraziun è vegnì exponi. Tuts, era las organisaziuns da l'ambient, hajan approvà la finala il project ed els hajan survegnì la lubientscha da bajegiar.
Nus essan sensibilisads e perquai vegnin nus a sclerir, schebain nus avain negligì insatge.
Perquai vulan els s'inscuntrar cun represchentants dals uffizis per sclerir quai. Dal reminent n'hajan els anc betg fatg insatge vid ils mirs sitgs, di il president da la cumissiun da meglieraziun. La finamira fiss da cuntinuar cun las lavurs vers la fin d'avust.