Siglir tar il cuntegn

Header

cuntegn

Nagin til da tschaiver Scola Breil na po betg ir cun il tren per far tschaiver a Sedrun

La scoletta fin la quarta classa da la scola da Breil avevan planisà da far ina visita al til da tschaiver a Sedrun. Ma suenter avair contactà la Viafier retica per pudair reservar plaz en il tren per la gievgia grassa n’è quai betg stà pussaivel. La problematica era il tren da return che parta da las 15:44 davent da Mustér. Per quest tren eran gia duas grondas gruppas annunziadas e perquai n’haja la Viafier retica betg pudì acceptar ina ulteriura gruppa cun radund 100 uffants, declera la pledadra da medias da la Viafier retica Yvonne Dünser. Els hajan empruvà da chattar soluziuns, ma adumbatten.

audio
Scola Breil na po betg ir a tschaiver a Sedrun
ord Actualitad dals 07.02.2024. Maletg: RTR
laschar ir. Durada: 3 minutas 3 Secundas.

Uss datti festa a Breil

Era ils responsabels da la scola da Breil han empruvà da chattar soluziuns. Ina idea fiss per exempel stada da parter si las scolaras ed ils scolars en gruppas pli pitschnas. Ma il return pli tard na saja betg vegnì en dumonda ed era betg d’affittar per exempel in bus. La scola da Breil ha dentant era menziunà che per els na saja quai betg uschè tragic ed els na veglian era betg dramatisar l’entira situaziun. La soluziun fiss stada da reservar pli baud il tren ed alura avessan probabel tuts gì plaz, di Yvonne Dünser. Betg pussaivel fiss stà da pender vitiers in ulteriur char vi da las cumposiziuns da tren novas, capricorn, declera Yvonne Dünser. Per las scolaras ed ils scolars da Breil datti entant tuttina in suentermezdi senza scola e cun in zic tschaiver, simplamain a Breil e betg a Sedrun.

RTR actualitad 17:30

Artitgels legids il pli savens