A partir da l’onn 2017 na datti betg pli la fiera da muvel a Glion. Il dumber d'animals annunziads per la fiera è stà pliras giadas memia pitschen. Tenor la lescha da fieras publicas da muvel ston almain 50 animals vegnir annunziads per ch’ina fiera possia vegnir manada tras, e quai en media sur 1 onn. A Glion n’è quai betg pli il cas.
Era fiera dubla cun Cazas senza succèss
Ord quai motiv ha la Grischun biestga SA, la societad affiliada da l’Uniun purila grischuna che organisescha las fieras da muvel el Grischun, decidì da na betg pli manar tras la fiera da muvel a Glion a partir da l’onn 2017. L’onn passà hai anc dà in’emprova da salvar la fiera cun organisar la fiera a Glion sco fiera dubla ensemen cun la fiera a Cazas. Quella emprova n’ha dentant betg gì success.
Transport da muvel a Cazas
Uschia ston era ils animal vegnir transportads da la Surselva a Cazas. Per sustegnair ils purs ha la Grischun biestga SA elavurà ina purschida da transport da biestga. CHF 70.- per animal custa il transport davent dal bain puril enfin a Cazas. Inclus el pretsch èn era la preschentaziun e vendita da l’animal. Uschia sto il pur gnanc bandunar il bain puril per vender animals. Forsa era pervia da quella purschida hai tenor il president da l’Uniun purila Surselva Curdin Capeder betg dà grondas reacziuns dals purs.
Fiera da nursas betg pertutgada
La fiera da nursas a Glion n’è betg pertutgada da quella decisiun da la Grischun biestga SA. Lezza giauda in bun renum naziunal e schizunt si da la Bassa vegnan purs cun lur nursas per vender ellas a Glion. Tenor Curdin Capeder n’è quella fiera betg periclitada per il mument e vegn vinavant ad avair lieu sco planisà.
Ord l'archiv
