I dettia dus motivs daco ch'i vegnia ordinà in scumond absolut, di il president communal Clau Schlosser. Da l’ina vart saja quai il problem cun la setgira ed ils davos onns hajan ins adina stuì scumandar da far fieu, da l’autra vart saja la protecziun da l’ambient in grond tema. Tuts discurrian da proteger l’ambient mo gist da la Festa naziunala vegnia sajettà rachetas en l’aria e quellas procurian per particlas finas e per bler rument ed era animals da chasa e selvadis sajan disturbads tras la canera, di Clau Schlosser. Quai veglian ins evitar. Era hajan ins gia survegnì pliras reacziuns e quai sajan tut reacziuns positivas, accentuescha il president communal.
Pitschen problem 1. d’avust, pli grond da Silvester
En general sajan ils fieus artifizials sa reducids ils ultims onns il prim d’avust e s’augmentads da Silvester – il scumond general valia era per Silvester. La problematica saja che bleras persunas laschian ir rachetas senza ponderar e pericliteschian uschia la segirtad. Perquai haja la suprastanza suenter lunga discussiun ordinà il scumond absolut per l’entir onn ed uschia saja il tema giud maisa.
Betg dapli controllas
Dapli controllas na vegnia però betg a dar il prim d'avust. Dus pumpiers hajan pichet e quai bastia. Sche persunas na sa tegnian betg vid il scumond, vegnian quels pledentads, ma quest onn na dettia quai nagins chastis. Era quinta Clau Schlosser betg cun problems, perquai ch’ils fieus artifizials sajan sa reducids marcant ils ultims onns.
Arosa cun lavur da piunier
L'onn passà aveva gia Arosa scumandà fieus artifizials. Sco quai che Pascal Jenny, il directur da turissem d'Arosa, ha ditg envers l'ANR, n'haja el anc mai gì tantas reacziuns positivas sin in scumond.
RR novitads 06:00
