La naiv da questa fin d'emna ha chaschunà divers accidents en Svizra. A Sagogn è in automobilist ì sur la via ora, perquai ch'el ha vulì guntgir l'auto da posta. El è crudà 10 meters d'ina plaunca giu. Duas da las 3 persunas en l'auto èn vegnidas blessadas lev. L'auto è vegnì donnegià dal tut. Il manischunz da l'auto è in turist talian da 43 onns.
Er giu la Bassa hai dà accidents pervi da la naiv – 40 sulettamain en il chantun Son Gagl. Il pli savens èsi restà tar donn da material. Medemamain ha la naiv chaschunà disturbis tecnics en il traffic da viafier. Consequentamain hai dà interrupziuns, las pli bleras en Svizra franzosa sco per exempel tranter Tramelan en il chantun Berna e Le Noirmont en il Giura. Là n'han ils trens betg pudì cursar perquai ch'i ha navì ferm.
RR novitads 14:00