Ses implant da glera sper il Rain anteriur en la Val Mulin a Schnaus (tranter Glion e Rueun) è predestinà per far naiv. Davent da mez november è la chava en la sumbriva. Quai fatg vul Martin Montalta nizzegiar. Las temperaturas fitg bassas e la gronda distanza tar il proxim vitg che pudess vegnir disturbà da la canera dal chanun da naiv, èn tut facturs positivs che ston vegnir resguardads.
L’idea da commerzialisar la naiv è naschida l'enviern passà. Lura ha l'Arena Alva pledentà Martin Montalta sch'i fiss betg pussaivel da far naiv en la sumbriva da la chava da glera e transportar quella a Laax. A Laax Murschetg eri simplamain memia chaud per far naiv. Mo uschia a la sperta na saja quai betg gartegià. Uss, in onn pli tard, è tut pront per commerzialisar la naiv.
Martin Montalta ha sco emprim tschertgà cumpraders potenzials per sia naiv ed era chattà quels. Las vischnancas da Laax, Falera e Sagogn sco era l'Arena Alva èn interessents per la naiv tecnica da Montalta.
Loipas cun naiv tecnica
L’idea da la vischnanca da Sagogn è da pudair porscher ina loipa d'almain 500 m sper il vitg. Quai n'è betg stà pussaivel ils davos onns pervia da la mancanza da naiv. Producir naiv en il paun sulegliv da Sagogn na va era betg.
Uschia è la cumpra da naiv tecnica ina schliaziun pussaivla, ha Hans Peter Casutt, il president da la vischnanca Sagogn, manegià. Sagogn dovra var 1’000 meters cubic naiv e la finala custa la loipa da 500 meters var 13’000 francs.
Con che in meter cubic naiv custass per exempel per ina persuna privata n'è anc betg cler, qua gioghian plirs facturs ina rolla. Surtut il transport gioghia ina rolla principala, ha Martin Montalta manegià.
RR actualitad 12:00