Siglir tar il cuntegn

Header

cuntegn

Surselva Nausch enviern disturba sanaziun da finanzas tar BVA

L'emprim onn suenter la sanaziun da las Pendicularas Breil Vuorz Andiast SA sto l'interpresa nudar in magher resultat. La stagiun cun pauca naiv ha franà las frequenzas.

audio
Mezdi: Pendicularas Breil-Vuorz-Andiast, puspè in onn deficitar
ord Actualitad dals 05.10.2016.
laschar ir. Durada: 2 minutas 21 Secundas.

Il minus dad 1,3 milliuns francs en il quint annual relativescha il president dal cussegl d’administraziun, Marcel Friberg. «Nus avain scrit giu la bella summa da passa 6 milliuns francs. L’onn avant èn quai stadas amortisaziuns da var 1,6 milliuns. Nus avessan era pudì schonglar las cifras e mussar in quint gulivà» declera el.

La situaziun difficila da la stagiun passada haja manà a damain frequenzas e grondas perditas tar las entradas, scrivan las pendicularas. Tut las stentas per porscher bunas cundiziuns per il sport d'enviern, n'hajan betg pudì cumpensar las sperditas tras la naiv mancanta.

Onn da gestiun 2015/16

Avrir la box Serrar la box
  • svieuta CHF 5'158'943.77
  • amortisaziun CHF 6'166'971.12
  • sperdita CHF 1'341'946.00
  • summa da bilantscha CHF 11'309'890.80

Ulteriur engaschi dals investiders

Avant in onn han las pendicularas stuì sanar las finanzas. Uschia ha la Anavon Breil SA investì 3 milliuns en las pendicularas e surpiglià 90% da las aczias, entant ch’ils acziunaris existents han stuì scriver giu lur aczias sin 10% da la valita. Tenor Marcel Friberg hajan ins ussa ina sauna bilantscha. Ils investiders da l’Anavon Breil SA hajan dentant anc ina giada mess daners en las pendicularas, per ch’ins possia cumenzar bain la stagiun d’enviern. Ussa dovria quai in bun enviern per ch’era la liquiditad saja puspè sin in nivel acceptabel, di Marcel Friberg.

Resort Pradas n’ha betg gì effect giavischà

Il Resort Pradas saja stà occupà fitg bain en ses emprim onn ch’el è avert. 37’000 pernottaziuns hajan ins pudì nudar dal schaner fin zercladur 2016. Sco Marcel Friberg di, in dumber fitg legraivel. Quai cunzunt sch’ins cumpareglia cun las 56’000 pernottaziuns dals hotels en la regiun turistica Surselva. Direct a las pendicularas hajan quellas pernottaziuns dentant betg purtà uschè bler sco giavischà. Era quests giasts giajan pli pauc cun skis sche las cundiziuns da naiv sajan nauschas, declera Marcel Friberg. Sch’i dettia ussa in enviern normal, lura è Marcel Friberg persvas ch’il ressort portia in augment da giasts sin pista. Pertge tar ils giasts dal resort sa tractia quai da giasts ch’èn fin ussa betg stads a Breil ed il resort saja gia ussa praticamain vendì ora.

RR novitads 11:00

Artitgels legids il pli savens