Siglir tar il cuntegn

Header

audio
Mustér: Runal duai survegnir segunda vita en il Nepal
Or da Actualitad dals 17.02.2022.
laschar ir. Durada: 3 minutas 2 Secundas.
cuntegn

Nepal Agid da svilup cun in runal da skis

Dapi radund 10 onns datti il contact tranter ils dus guids da muntogna Ervin Jacomet da Mustér e Tschiring Sherpa dal Nepal. Dapi ch’ils Nepalais han vis co ch'ins po ir cun skis dal culm giu, èn els fascinads e vulan emprender quai.

Il 2016 èn els vegnids per l’emprima giada a Mustér en scola da skis. Lur siemi è uss da bajegiar si in'infrastructura e cultura da skis en il Nepal. Fin uss n’exista ina tala betg, di Ervin Jacomet. Tut era pront per exportar in runal da Tujetsch, ma la situaziun da corona ha impedì l'acziun. Uss sajan ins vid organisar e transportar en il Nepal in runal pitschen che la scola da skis na sappia betg pli duvrar. Quai saja prudent, il runal na giaja betg en il fier vegl e la segirtad saja garantida, uschia Jacomet. Els vegnian ad accumpagnar bain il project.

video
Runal da skis da Mustér duai ir en il Nepal
Or da Telesguard dals 17.02.2022.
laschar ir. Durada: 4 minutas 44 Secundas.

Kalinchuk e Mustér han parallelas

Il lieu da Kalinchuk en il Nepal vala sco lieu da pelegrinadi cun plirs tempels, sumegliant a Mustér cun la claustra. Uschia existia gia uss in'infrastructura turistica, cun hotels ed ina sutgera. Quella maina dentant tar in tempel e betg sin pista, di Ervin Jacomet. Il runal da Mustér fiss l’emprim runal da skis en il Nepal. Ma senza il sustegn dal stadi na funcziunass in tal project betg. Uschia sustegnia il stadi activamain il svilup e s’interesseschia fitg. co ch'els quintan da realisar quel. Era finanzialmain vegnia il stadipli probabel a sustegnair il transport dal runal vegl. La gronda part saja dentant finanziada tras donaturs privats, di Ervin Jacomet.

Els realisassan pli gugent in project cun in runal nov, ma ils daners sajan in factur essenzial. Els dus veglian far pass per pass e betg inventar da nov la roda. Cura che tut vegnia dischlocà na possian ins betg dir il mument. Quai che saja sin via, saja la scolaziun dals guids nepalais ed ils contacts, ed uschia saja uss sulet d’avair pazienza e da dar gas. Lura vegnian els da gidar il pajas da sa sviluppar er en il sectur da skis ed uschia pussibilitar in svilup general, manegia Ervin Jacomet.

RTR actualitad 11:45

Artitgels legids il pli savens

Scrollar a sanestra Scrollar a dretga