L’ auto-cisterna veder, ch’è stà 33 onns en servetsch, n’ademplescha betg pli las pretensiuns dumandadas als pumpiers en la vischnanca da Glion suenter la fusiun l’onn 2014. El è simplamain memia plauns. Entaifer 10 minutas suenter che l’alarm da fieu è dà, sto l’emprim pumpier esser sin il plaz dal brischament. En la vischnanca fusiunada n’è quai dentant betg pli pussibel cun il vehichel veder, perquai che differentas fracziuns èn memia lunsch davent da la basa da pumpiers da Glion.
Ord quai motiv ha la vischnanca decidì da remplazzar quai auto-cisterna cun in nov. Il nov auto è pli spert, ha ina tracziun a quatter rodas e dispona vitiers anc d’in tanc d’aua pli grond. 2’400 l aua stattan uss a disposiziun als pumpiers, quai èn ca. 30 bogneras plainas. Plinavant è l’auto equipà cun different material tecnic sco p.ex. uders, indriz d’illuminaziun, generaturs e reservuars d’oxigen. Custà ha il nov auto-cisterna CHF 335’000.-.
CHF 515’000.- per il corp da pumpiers
Sper il nov auto-cisterna ha il corp da pumpiers anc savì prender en funcziun ulteriurs novs vehichels ils davos onns dapi la fusiun da la vischnanca da Glion. Uschia ha i dà in bus per transportar persunas, in vehichel spezial per tschentar uders e per l’onn 2017 è planisà la cumpra d’in auto cun punt cun cabina dubla.