Nov center da cumpra tranter Glion e Schluein

Tranter Glion e Schluein, en la zona d’industria Isla, vegn bajegià in nov center da cumpra. Il locatari principal vegn ad esser Lidl cun 1‘400 m2 surfatscha da vendita.

fatschenta da cumparar en cun ina dunna ed um che freda vid ina oranscha Bild in Lightbox öffnen.

Legenda da maletgs: La finamira è da porscher sut in tetg tut quai ch’ins dovra mintga di. Keystone

Era ina gronda part dal center vegn la Landi a duvrar, numnadamain 900 meters quadrat. Dasperas vegnia quai anc a dar ina pasternaria cun cafetaria, ina mazlaria e diversas autras fatschentas localas. La finamira è da porscher sut in tetg tut quai ch’ins dovra mintga di. Igl entir areal cun ils parcadis ha ina surfatscha da 17’000 meters quadrat.

Investur grond è la fundaziun da famiglia Toni Hilti

L’interpresa che ha projectà il center da cumpra ed che ha tschertgà investurs è la Schluein Isla Immobilien SA.

Tenor il president dal cussegl d’administraziun, Conradin Rüegg, vegn il project finanzià da la fundaziun da la famiglia Toni Hilti, il fundatur da la enconuschenta interpresa da maglia Hilcona. «La famiglia ha grond interess vi da la regiun e vesa in grond potenzial per la zona d’industria Isla», uschia Rüegg.

Fermada dal bus e temps d’avertura prolungads

Il nov center da cumpra sa chatta sin il territori da Schluein. Per attrair fatschentas, è la vischnanca promta, da discussiunar cun la Schluein Isla Immobilien SA sur d’ina fermada da bus sper il center e sur da temps d’avertura prolungads. Dentant mo sche l'interess dals locataris è avant maun. Las lavurs da stgavament han cumenzà ils 16 d’avrigl. L’avertura dal nov center da cumpra è planisada il pli tard per la fin da favrer 2016.