Siglir tar il cuntegn

Surselva Nov gestiunari per ils Volgs da Falera, Laax e Sagogn?

Ils commembers da l’associaziun da consum Falera-Laax han da decider, sch’els vulan surdar il manaschi da las 3 stizuns a Falera, Laax e Sagogn ad ina interpresa externa.

Il Volg a Laax.
Legenda: Il Volg a Laax. RTR, G. Hosang

Ils 3 Volgs a Falera, Laax e Sagogn, il gestiunari è l’associaziun da consum Falera-Laax, han da cumbatter cun la concurrenza entras gronds centers da cumpra ch’èn vegnids averts ni ch’èn planisads el conturn da Glion.

Christian Capaul.
Legenda: Christian Capaul. Maletg da pressa

Tenor il president da l’associaziun Christian Capaul è la svieuta da las 3 stizuns crudada per 8,5% ils davos 5 onns. Plinavant ston las stizuns a Falera e Laax vegnir modernisadas ed investiziuns da total ca. CHF 1,4 milliuns èn planisadas ils proxims onns. Per savair finanziar quellas investiziuns, ha la suprastanza sclerì differents scenaris.

Surdar manaschi u cuntinuar sez

Ils commembers han da decider sur da dus scenaris:

  • surdar il manaschi ad ina interpresa externa
  • sez manar vinavant las 3 stizuns cun far las investiziuns necessarias

Interessents per surprender il manaschi haja dà blers, di Christian Capaul. A la votaziun vegn proponì da surdar il manaschi u a la Volg Detailhandels SA, ella è gia uss furnitura da martganzia per las 3 stizuns, u a la SPAR Handels SA. Omaduas interpresas èn prontas da manar las stizuns a Falera e Laax per almain 10 onns, cun surpigliar il persunal e pajar las investiziuns necessarias. La SPAR Handels SA na vul dentant betg surpigliar la stizun a Sagogn. La Volg Detailhandels SA surpigliass quella stizun mo sut la cundiziun, ch’ella na stoppia betg pajar tschains da locaziun per il local. Il possessur dal local è la vischnanca da Sagogn, che stuess acceptar quella cundiziun.

Il Volg a Sagogn.
Legenda: Il Volg a Sagogn. RTR, G. Hosang

Manar sez cun success saja pussibel

Cun surdar il manaschi ad ina interpresa externa faschess l’associaziun da consum Falera-Laax mintg’onn in gudogn da circa CHF 60’000.-, e quai senza stuair far investiziuns e senza ristga. L’associaziun perdess dentant la pussaivladad da prender influenza. Tenor Christian Capaul saja i pussibel da sez manar vinavant las stizuns senza sperdita e cun savair finanziar las investiziuns planisadas. Il potenzial cunzunt a Falera e Laax saja gronds. Manar vinavant la stizun a Sagogn saja dentant era per l’associaziun mo pussibel, sch’il tschains da locaziun crodia davent. Els hajan gia tschentà la dumonda a la vischnanca da Sagogn.

RR Actualitad 12:00